DUE NOVEMBRE 1917 - 2020

Mi piace pubblicare la splendida poesia "Caporetto 1917", più nota a tutti come "L'è el dì di Mort, alegher!", forse anche voi troverete qualche assonanza alle paure dell'oggi. (a.r.)
 
Torni da vial Certosa,
torni di Cimiteri
in mezz a on someneri
de cioccatee che vosa,
de baracchee che canta
e che giubbiana in santa
pas con de brasc la tosa.
 
L'è el dì di Mort, alegher !
Sotta ai topiett se balla,
se rid e se boccalla;
passen i tramm ch'hin negher
de quij che torna a cà
per magnà, boccallà:
scisger e tempia... alegher
 
fioeuj, che semm fottuu! 
I noster patatocch
a furia de traij ciocch, 
de ciappaij per el cuu, 
de mandaij a cà busca
m'àn buttaa via la rusca, 
scalcen a salt de cuu,
 
scappen, sti sacradio,
mollen el mazz, me disen
mollen i arma, slisen
de tutt i part, el Zio 
me l'à pettaa in del gnàbel 
longh quatter spann e stàbel, 
l'è el dì di Mort e dio!
 
Passen i tramm ch'hin negher 
gent sora gent... lingera...
tosann e banch de fera ! ...
«Oh i bej coronn ! » « Alegher ! »
«Oh i bej lumitt ! » « oh i pizzi,
le belle tende, oh i pizzi! »
« L'è el dì di Mort... alegher! »
 
... e giò con sta missolta
de locch che a brigadella
canta alla-loibella :
 
« 0 macchinista
ferma il diretto
perchè al distretto
me tocca andà ... »
 
- questa l'è bonna ! scolta:
 
 « stacca la macchina,
 ferma il diretto
 che son costretto
 d'andà a soldà! »
 
 a furia de batost
tirom là... « Caldarost ! »
... e giò vers porta Volta,
 
adree con sto mis-masc
de ciocch che se balanza...
Te vedet ?! no me vanza
pu che i nost quatter strasc,
l'eredità l'è andada,
semm in bolletta in strada
tornèmm a fà el pajasc !
 
Comincia adasi... adasi...
a vegnì sira... e là...
- canten anmò, dà a trà -
 
« ... che al mio paese
voglio tornà ... »
 
giò vers Milan l'è quasi
scur... rong e semineri,
navili e cimiteri
suden adasi, adasi,
 
umed e nebbia... Ottober,
cocober... pover nun !
vun per vun, vun per vun,
me perteghen i rogher !
Oh Gesù, che sbiottada
de piant ! che pertegada
là sù ! ... Ottober... cocober !...
 
Turines giolittian,
milanes socialista,
coragg, lustrev la vista !
Tognitt de San Damian,
slarghev el coeur, hin chì
torna i todisch... hin chì...
riven qui car pattan,
 
qui car barbis, qui rost
de cojn ! A stondera
per i banch della fera
pavani e pensi ai nost
miseri: ... rogn, deslippa
e generaj de pippa !
... e quell dì... «Caldarost !...
 
Caldarost !...» ... e quell dì
vedi... (Madonna ! dò ?
 tre settimann ammò ?...)
... che in piazza o forse lì
dal Briosch: « T'ée sentii ? ...
- me diran - …t'ée sentii ? ...
...riven... ghe semm... hin chì...
 
mòllen di part de Bressa, 
riven... hin a Veston ! 
de Desenzan, Gardon 
scàppen... cara el me Tessa, 
stemm d'oca ! ... » e mi, de slanz, 
foeura!... lì inscì denanz 
del Campari... gh'è ressa...
 
pienna la Galleria...
gent che rebutta... duu
che vosa... «...A pee in del cuu
vemm inanz ! ... sansesia
m'àn sfottuu ! » «Non bisogna
cedere! » ... gent che rogna...
gent che inziga sott via...
 
che rebuij e che baia.
Balengo, rocchetton,
vasco, batta-bastion,
vàrdela la loccaja,
ch'è sbottida di boeucc
foeura in Piazza! Linoeucc,
coo d'aria, razzapaja,
 
foeura a fagh festa al Zio!
«Silenzio ! » « Taja ! ... Taja ! ... »
Sèntela la loccaja
che se scadenza ! ... « ... Mio
oeij Majo! ...tirel piatt !
mócchela, ciccolatt ! »
« Ma silenzio... per Dio! »
 
« Citto ! » Dai ammezzati
lèggen a ona finestra
el Bolettin « ...a destra
del Brenta, incendiati
i depositi, in dura
lotta nella pianura,
ci siamo ripiegati ... »
 
 «Te sèntet ?... ripiegati ! » 
« Silenzio! » « Cóppet! faccia 
de cuu de can de caccia! » 
« ... coi reparti alleati ... » 
«... bon quell'oss! » « Ma tralasci
 i suoi commenti e lasci
terminare! » « ... e schierati
 
combattendo fra Po
ed Adige, sul Mincio,
secondo i piani ... » (... crincio!
tè lì dov'hin gemò!
 sul Mincio... propi !) « abbiamo... »
« Cossa l'à ditt? abbiamo...
e Poeu ? se capiss nò ! »
 
« L'à di tt - evacuato ! - »
« Coss'è ? » «Mah ! » « ad occidente...
 abbiamo nettamente
 respinto ... » «... Evacuato
 putost ! »  « ... in nostre mani »
 «Tutt ball ! » « areoplani...»
« ...Ghe voeur alter ! » « ... firmato
 
Cadorna ! » «Bolletton !
va a scóndet, brutt malann
e càscen pu de cann ! »
« Se sent gemò el canon
feura di dazi ! » « Lei,
non si vergogna Lei ! »
«De coss'è ? gh'è el canon,
 
segua ! gh'è el canon
che se sent! » «Allarmista ! »
« Napoli ! » «Disfattista ! »
« Va al tò paes, rognon
de fidigh! ... aria! » «Lei,
Lei, venga con me, Lei ! »
«Mi, con lu ?! L'è el padron
 
 del vapor lu ? dà a trà,
oeuj, el voeur menamm sù,
el voeur ! ... ma chi l'è lu ?
chi l'è ? » « Làssel andà ! »
« Napoli ! » « Rinnegato ! »
«L'è vun del Comitato ! » 
« Daij che l'è on sciatt ! ... sà... sa
 
oeuj ! » « Làssel andà ! » « Giò !
pèstegh giò ! » « Italiani
senza patria ! a domani ! »
«Doman, sì! ... speccia bò! » 
« Lobbia! » « va al tò paes,
o crist d'on milanes
arios! va a digh ai tò
 
ch'àn sbagliaa el primm botton,
tiren inanz la guerra 
per coppamm, tramm in terra, 
eccola la reson! » 
« Mascanbroni, l'è ora 
de finilla ! » « In malora
m'àn traa ! ... » « Rivoluzion,
 
sù! ... su ! ... Rivoluzion! »
« Avanti, o Popolo, alla riscossa !
Bandiera rossa, bandiera rossa ! »
... Signor ! Signor ! ...deslippa,
rogn, generaj de pippa, 
vemm a tocch e boccon! ... 
Rivoluzion... vardee! ... 
Car Signor, compagnee 
quj de per lor...
 
«Bandiera rossa la s'innalzerà,
 Bandiera rossa della libertà! »
 
 Canzon
 
de guerra, della trista
guerra, sù! sù bandera
rossa de temp de fera!
Anarchich, socialista,
sù che ghe semm... l'è ora!
sbragee, scarpev la gora,
allon, lustrev la vista,
 
slarghev el cocur, ghe semm!
E ìntrattanta che dì
per dì, giò, dì per dì,
d'ora in ora andaremm
giò, giò, a pocch a pocch
tutti in d'on mucc a tocch
e boccon, a patremm,
 
che sulla Madonnina
«Bandiera rossa ... » là
sù... « ... la s'innalzerà ! »
e che faran tonina
per i cà, per i straa,
per i piazz... « ... àn coppaa
l'Albertin, stamattina,
 
viva nun !... l'àn traa là,
Pugn, pesciat... « l'eet voruda
la guerra, porco giuda !... »
daij, sassat... gh'àn faa fà
la mort del Prina! » intanta
che se coppa e se canta,
tè lì... cominciarà
 
per Milan la passada 
di legor... on mis-masc, 
on mes'cioss, mucc de strasc, 
gent stremida, sbiottada
e che in fuga... « ...i croatt...
croatt...! » van a sbatt
so oss su ona strada !
 
Paisan ch'àn lassaa
là... terra, vacca, roij
e se rusen... « Madoij,
na poss più! » ... caregaa 
come muij, coi fioeu 
e la donna « 0 Tanoeu, 
scià... gnèman ... » e soldata
 
e soldaa in filera
trista, in filera grisa...
« ... taj ala corda, slisa,
femm societaa... bandiera
rossa... suu ! » e el canon
che brontolla, el canon
Che rogna in la scighera...
 
Scolta! vers Melegnan
giughen ai bocc col Zio,
riven sta volta e dio ! ...
vegnen sù de Drusan,
passen de Modigliaa,
Colturan, San Donaa,
passen l'Adda a Cassan,
 
salta el pont de Paderno,
brusa stabiliment,
Cà, gent che sgara, gent 
che se calca... e l'inverno, 
la nebbia, fora... fora... 
areoplan che sgora, 
bomb che s'cioppa! on inferno!
 
 fora... fora... scappemm!
E me pader che balla
per cà... « ... ma coss te calla
ancamò ? vemm o stemm ? »
« Senio, cià, damm i sent,
vardi là... gh'è pu nient 
de mett dent ? » « ... prest, andemm,
 
sara sù ... dove veet,
Clara ! ... la macchinetta
del spirit? petta, petta
tè la chi, coss te gh'eet
de mett dent ancamò ?
quisti chì ? ... » « ... secca nò,
lassa stà, se te gh'eet
 
d'andà alla Banca, va,
ciappa temp, va alla Banca 
putost, va - l'è puranca 
on toeu fiaa quell'omm ! - » Là 
ai cassett gh'hin là tucc 
del scior Cerutti in mucc
ai sporteij ... «Firma, cià
 
sto librett... la ciavetta ...
derva ... » e foeu... cinqu per cent,
cartell, posat d'argent,
trii e mezz... e impacchetta,
liga... « ... e quj della Lina?
quj della zia Angelina?
e qui dell'Erminietta ?
 
(gh'óo pienna la cassetta
della roba di alter ... )
cossa en foo ? ghe voeur alter 
chì che sta valisetta! ... 
cià... cià ... quj della zia, 
tuscoss ... » e via, e via 
a pescian vers Corbetta
 
a pescian vers Baregg,
Sedrian, vers Tesin
e dree-via (on trattin
trenta mja !) a paregg
che vivee! che dissolta !
(e la nebbia ! e la molta !)
on mes'cioss, on bodegg
 
in ombria... e se va,
e se va... e la sira
intrattanta, la sira
che ven foeura de cà,
che s'ínvia e col sò
smorziroeu la ven giò,
per incoeu, a requià
 
trebuleri, a quattà
miseri... e la nott poeu
che la gattona foeu
con la pattona ! ... e va
che te va... dove vemm ?
a Tesin ? a patremm?
 dove semm?... giò de là...
 
(vers Milan ? vers Baregg ?)
... giò de là... che scuroeu !
Gesù-dio ! o fioeu,
degh on oeucc ! a paregg
(dove sont ?) on vivee ... 
baracchee... cioccatee ... 
(fegh a ment!) on bodegg
 
in ombria... dessèdet,
sù descàntet ! ... lingera,
tosann e banch de fera! 
Gamba-de-legn... te vèdet,
ghe semm denter ! tramm negher, 
gent sora gent, alegher !
l'è el dì di Mort... dessèdet !
 
Torni de la Bullona, 
torni di Cimiteri, 
in mezz a on someneri 
de vasco che slandronna, 
de trionfa... «La vita,
- passa on carell - La vita
sciori ! » ... che se dondonna,
 
che giubbiana e che baja.
Là di part del Rondò
- fèrmet on bott - là giò,
 sèntela la loccaja
 che la ghe va su bella! 
 
« Cadorna per le feste 
l'à scritto alla Regina: 
- la voeur vedè Trieste ?
gh'el mandi in cartolina ! -
Bim, bom, bom
Al rombo del canon! »
 
a rosc e a brigadella
sotta la nivolaja
 
umeda, pien de vin,
cànten su la bassora,
cànten a scarpa-gora...
 
« ... e m'ànno destinato
 al sesto fanteria
per essere mandato
alla macelleria !...
Bim, bom, bom,
al rombo del canon! »
 
 A pos al Sempionin,
 vàrdela là la faccia
del sô che la se quaccia
sotta al so prepontin
 
de nivol … sotta ai dobbi !
- tosann, andemm a nana
sotta i covert de lana !
Sbarlusa sora ai stobbi...
(di part della Bullona
gamba-de-legn che sona !)
... sbarlusa in mezz ai pobbi
 
del stradon de Musocch
dree-terra ona rianna
de foeugh... là... che sanguanna!
 
« ... ma el general Cadorna
 el magna, el bev, el dorma
bim, bom, born
al rombo del canon! »
 
 canzon che riva a tocch
 e boccon e slontanna
di part de là... rianna
de sang che a pocch a pocch,
 
gott a gott, sui camin,
sui copp di lavoreri
de guerra - semineri
de sced, de magazzin,
de campat - gott a gott
la còla sang a sfott
l'asnin caga-zecchin
 
dell'ingeniee Titola-
Babeo ch'el fa grassa,
sotta quella faciassa
(e gotta sang, e còla
sang) sotta alla faciassa
del sô...
 
« bim, bom, bom
al rombo del canon »
 
... che la se sbassa,
rossa come ona polla,
 
su quij che se morisna
là... ch'àn finii la guerra
e se dio voeur, sott-terra,
in màser... (e carisna,
e scender... ) - che fameja ! -
dormen sotta ona preja !
( ...e scendera, e carisna ! )
 
Pàssen i tramm, scampànen!
Molla Tanoeu ... ! brisaola,
scisger e tempia e a tavola !
Canten e se slontànen
- scolta - i compaa del Zio...
L'è el dì di Mort e dio !
L'è el dì di Mort e ámen !